Ҳаҷми хизматрасониҳои пулакӣ дар Тоҷикистон 13,9 фоиз афзоиш ёфт

Дар моҳҳои январ–сентябри соли 2026 ҳаҷми хизматрасониҳои пулакӣ дар Ҷумҳурии Тоҷикистон, ки аз ҷониби субъектҳои ҳамаи соҳаҳои хизматрасонӣ пешниҳод гардидаанд, ба 26 миллиарду 393,1 миллион сомонӣ расид. Ин нишондиҳанда нисбат ба ҳамин давраи соли 2025 бо нархҳои муқоисавӣ 13,9 фоиз зиёд мебошад. Индекси нархҳо дар ин давра 105,9 фоизро ташкил додааст.

Аз ҳаҷми умумии хизматрасониҳои пулакӣ 18 миллиарду 658,7 миллион сомонӣ ё 70,7 фоиз ба хизматрасониҳои ба аҳолӣ пешниҳодшуда рост меояд. Ин нишондиҳанда аз ҷойгоҳи муҳими хизматрасониҳо дар таъмини талаботи рӯзмарраи аҳолӣ ва рушди бозори хизматрасонӣ дар кишвар шаҳодат медиҳад.

Дар тақсимоти минтақавӣ шаҳри Душанбе аз рӯйи ҳаҷми хизматрасониҳои пулакӣ ба ҳар нафар аҳолӣ мавқеи пешсафро ишғол менамояд. Тибқи маълумоти оморӣ, нишондиҳандаи мазкур дар пойтахт нисбат ба сатҳи миёнаи ҷумҳуриявӣ 5,3 баробар зиёд мебошад.

Фарқияти нишондиҳандаҳои минтақавӣ аз тақсимоти гуногуни ҳаҷми хизматрасониҳо ва сатҳи рушди ин соҳа дар минтақаҳои кишвар дарак медиҳад. Махсусан, мавқеи шаҳри Душанбе дар ин самт аҳаммияти пойтахтро ҳамчун маркази асосии хизматрасонӣ инъикос менамояд.