АФЗОИШИ ШУМОРАИ АҲОЛӢ ВА ТАҒЙИРОТИ ДЕМОГРАФИИ КИШВАР

Тибқи ҳисобҳои пешакӣ, бо дарназардошти шумораи таваллудшудагон, фавтидагон ва равандҳои муҳоҷирати аҳолӣ, то 1-уми июли соли 2026 шумораи аҳолии Ҷумҳурии Тоҷикистон ба 10 миллиону 817,7 ҳазор нафар расид. Ин нишондиҳанда нисбат ба ҳамин давраи соли 2025 2,0 фоиз зиёд буда, идома ёфтани тамоюли афзоиши аҳолиро дар кишвар нишон медиҳад.

Афзоиши шумораи аҳолӣ яке аз нишондиҳандаҳои муҳими демографӣ ба ҳисоб рафта, тағйирёбии он пеш аз ҳама ба таносуби байни таваллуд ва фавт, инчунин равандҳои муҳоҷирати аҳолӣ вобаста аст. Дар маҷмӯъ, афзоиши аҳолӣ дар ҷумҳурӣ аз бартарӣ доштани афзоиши табиӣ ва таъсири равандҳои муҳоҷират ба шумораи умумии аҳолӣ ташаккул меёбад.

Таҳлили маълумоти минтақавӣ нишон медиҳад, ки аҳолӣ дар ҳудуди ҷумҳурӣ нобаробар ҷойгир шудааст. Аз рӯи шумораи аҳолӣ вилояти Хатлон дар ҷойи аввал қарор дошта, то 1-уми июли соли 2026 дар ин минтақа 3 миллиону 919,2 ҳазор нафар зиндагӣ мекунанд.

Вилояти Суғд аз рӯи шумораи аҳолӣ мавқеи дуюмро ишғол намуда, шумораи аҳолии он ба 3 миллиону 35,8 ҳазор нафар расидааст.

Дар ноҳияҳои тобеи ҷумҳурӣ шумораи аҳолӣ 2 миллиону 325,1 ҳазор нафарро ташкил додааст. Дар шаҳри Душанбе бошад, то санаи мазкур 1 миллиону 300,8 ҳазор нафар аҳолӣ ба қайд гирифта шудааст.

Дар Вилояти Мухтори Кӯҳистони Бадахшон шумораи аҳолӣ 236,8 ҳазор нафарро ташкил медиҳад.

Бо назардошти нишондиҳандаҳои то 1-уми июли соли 2026 метавон хулоса кард, ки тамоюли афзоиши аҳолии Ҷумҳурии Тоҷикистон идома дошта, шумораи умумии аҳолӣ дар муқоиса ба ҳамин давраи соли гузашта 2,0 фоиз зиёд шудааст. Ин раванд дар баробари таъсири мусбат ба иқтидори меҳнатӣ ва бозори дохилӣ, зарурати идомаи тадбирҳои ба рушди инфрасохтори иҷтимоӣ, беҳтар намудани сатҳи хизматрасонӣ ва истифодаи самараноки захираҳои инсонӣ нигаронидашударо бештар менамояд.