ҶАВОНОН — НЕРУИ ПЕШБАРАНДАИ РУШДИ ДАВЛАТ ВА ОМОРИ МУОСИР

Таҳти ин унвон имрӯз дар Агентии омори назди Президенти Ҷумҳурии Тоҷикистон бахшида ба Рӯзи ҷавонони Тоҷикистон ҳамоиши тантанавӣ баргузор гардид.

Дар чорабинӣ муовини Директори Агентии омори назди Президенти Ҷумҳурии Тоҷикистон Зарина Назарзода, роҳбари дастгоҳи Иттифоқи ҷавонони Тоҷикистон Олимҷон Забирзода, кормандон ва ҷавонони фаъоли Агентӣ иштирок намуданд.

Ҳамоиш бо садо додани Суруди миллии Ҷумҳурии Тоҷикистон оғоз гардида, сипас муовини Директори Агентӣ Зарина Назарзода чорабиниро ифтитоҳ намуд. Мавсуф зимни суханронии худ аз нақши ҷавонон дар пешрафти ҷомеа, рушди низоми омори давлатӣ ва татбиқи ҳадафҳои стратегии кишвар ёдовар шуда, таъкид намуд, ки имрӯз ҷавонон ҳамчун неруи созанда ва ташаббускор дар пешбурди фаъолияти мақомоти давлатӣ саҳми арзанда мегузоранд.

Ҳамзамон, паёми табрикии Директори Агентии омори назди Президенти Ҷумҳурии Тоҷикистон Ҷамшед Нурмаҳмадзода ба муносибати Рӯзи ҷавонони Тоҷикистон ба самъи ҳозирин расонида шуд. Дар паём саҳми ҷавонон дар рушди давлатдорӣ, таҳкими истиқлолияти миллӣ ва пешрафти соҳаи омор баланд арзёбӣ гардида, ба онҳо дар фаъолияти минбаъда комёбиҳои нав орзу карда шуд.

Дар идома роҳбари дастгоҳи Иттифоқи ҷавонони Тоҷикистон Олимҷон Забирзода суханронӣ намуда, зикр кард, ки сиёсати давлатии ҷавонон дар Ҷумҳурии Тоҷикистон таҳти роҳбарии хирадмандона ва дастгириҳои доимии Пешвои миллат муҳтарам Эмомалӣ Раҳмон ба яке аз самтҳои афзалиятноки сиёсати давлатӣ табдил ёфтааст. Қайд гардид, ки маҳз таваҷҷуҳу ғамхориҳои пайвастаи Пешвои миллат барои фароҳам овардани шароити мусоид ҷиҳати таҳсил, фаъолияти касбӣ, рушди неруи зеҳнӣ ва иштироки фаъолонаи ҷавонон дар ҳаёти сиёсиву иқтисодӣ ва иҷтимоии кишвар заминаи устувор гузоштааст.

Сипас як қатор ҷавонони фаъоли Агентӣ суханронӣ намуда, аз имкониятҳои фароҳамгардида барои ҷавонон, дастгирии роҳбарияти давлат ва Ҳукумати мамлакат, инчунин нақши ҷавонон дар рушди соҳаи омори давлатӣ ибрози назар карданд.

Дар қисмати дигари чорабинӣ як гурӯҳ ҷавонони фаъолу ташаббускори Агентӣ барои фаъолияти намунавӣ, саҳми арзанда дар пешбурди соҳа ва иштироки фаъолона дар ҳаёти ҷамъиятӣ бо сипосномаҳои Агентии омор ва сипосномаҳои мақомоти ҷавонон қадрдонӣ гардиданд.

Дар фарҷоми ҳамоиш Зарина Назарзода суханронӣ намуда, ҷавононро ба ҳисси баланди ватандӯстӣ, масъулиятшиносӣ, донишандӯзӣ ва саҳмгузорӣ дар рушди соҳаи омор ва пешрафти Тоҷикистони соҳибистиқлол ҳидоят кард. Ҳамчунин изҳори умедворӣ намуд, ки ҷавонони Агентӣ минбаъд низ дар чорабиниҳои ҷумҳуриявӣ ва ташаббусҳои мақомоти давлатии кор бо ҷавонон иштироки фаъолона хоҳанд дошт.

Чорабинӣ дар фазои самимият, эҳтиром ба арзишҳои миллӣ ва қадршиносии нақши ҷавонон дар рушди давлату ҷомеа баргузор гардид.