ВОХӮРИИ ДИРЕКТОРИ АГЕНТИИ ОМОР БО САФИРИ ИТТИҲОДИ АВРУПО ДАР ҶУМҲУРИИ ТОҶИКИСТОН

28 апрели соли 2026 дар шаҳри Душанбе вохӯрии Директори Агентии омори назди Президенти Ҷумҳурии Тоҷикистон Ҷамшед Нурмаҳмадзода бо Сафир – Роҳбари Намояндагии Иттиҳоди Аврупо дар Ҷумҳурии Тоҷикистон ҷаноби Дарски Радослав баргузор гардид.

Дар оғози мулоқот Директори Агентӣ ҷаноби Дарски Радославро ба муносибати таъин гардиданаш ба ин вазифаи масъул табрик намуда, ба ӯ дар фаъолияти минбаъда барору комёбиҳо таманно кард.

Зимни суҳбат ҷонибҳо сатҳи кунунии ҳамкориҳои дуҷонибаро баланд арзёбӣ намуда, нақши Иттиҳоди Аврупоро ҳамчун яке аз шарикони муҳими рушд дар дастгирии ислоҳоти институтсионалӣ ва таҳкими иқтидори миллӣ таъкид намуданд.

Қайд гардид, ки дар доираи ҳамкориҳои мутақобилан судманд, аз ҷумла дар доираи татбиқи лоиҳаи «Барномаи дастгирии таҳсилоти босифат II», ки аз ҷониби Иттиҳоди Аврупо маблағгузорӣ гардида, бо дастгирии Бонки Ҷаҳонӣ амалӣ мешавад, дар соли 2025 Таҳқиқоти қувваи корӣ гузаронида шуд. Ҳамзамон, дар соли 2026 гузаронидани марҳилаи дуюми ин таҳқиқот дар назар дошта шудааст.

Дар идомаи мулоқот масъалаҳои густариши ҳамкориҳои минбаъда дар самтҳои афзалиятноки соҳаи омор, аз ҷумла гузаронидани таҳқиқоти оморӣ дар бахши хизматрасонӣ, омӯзиш ва татбиқи таҷрибаи пешқадами кишварҳои Иттиҳоди Аврупо, ҷорӣ намудани технологияҳои муосир, аз ҷумла зеҳни сунъӣ ва истифодаи манбаъҳои алтернативии маълумот мавриди баррасӣ қарор гирифтанд.

Дар анҷоми вохӯрӣ ҷонибҳо омодагии худро ҷиҳати таҳкими минбаъдаи ҳамкориҳои мутақобилан судманд таъкид намуданд.